भूमीपुत्र न्यूज / केदार लोहकरे
चाकोरे, प्रतापनगर ता माळशिरस येथील अंगणवाडी सेविका संगीता कोळेकर यांनी आपल्या लहान भावाच्या दोन्ही किडन्या खराब झाल्यामुळे आपली एक किडनी भावाला दान करून बहिणीचे कर्तव्य निभावले आहे.पुणे येथे जहाँगीर हाॅस्पीटल या ठिकाणी या दोघांची शस्त्रक्रिया यशस्वी पार पडली आहे. या अतूट नात्याची यामुळे सर्वत्र चर्चा होत आहे.
पुणे येथे मॅकेनिकल इंजिनिअर असलेला धाकटा भाऊ म्हाकू मारूती विरकर (वय ३२) यांच्या दोन्हीही किडन्या लहान वयातच खराब झाल्यामुळे त्याला एका किडनीची आवश्यकता होती.अंगणवाडी सेविका असलेल्या संगीता कोळेकर (वय ४२) यांनी विलंब न करता आपली एक किडनी भावाला देवून बहिणीचे कर्तव्य तर पार पडलेच पण त्याच बरोबर भावाचा जीव वाचवला आहे.भावाला दिर्घायुष्य लाभावे यासाठी बहिणीने दातृत्वाचे काम केले आहे.
संगीता कोळेकर या गेली २५ वर्ष चाकोरे येथे अंगणवाडीत सेविका पदावर कार्यरत आहेत.दहा वर्षापुर्वी त्यांच्या पतीचे निधन झाले असून तेव्हापासून त्या एकट्या व त्यांच्या सासू संसाराचा गाडा ओढत आहेत.त्यांना तीन मुली व एक मुलगा असून तीनही मुलीनी कृषी महाविद्यालयाच्या पदवी प्राप्त केली आहे.श्रीमती कोळेकर यांना भावाला किडनी दिल्यामुळे त्याचा त्यांना आनंद तर झालाच पण आई वडिलांच्या चेह-यावरचे समाधान पाहून त्यांना आनंद अश्रू आवरता आले नाहीत
