कोळेगांव येथे ‘श्री राम जन्मोत्सवा’निमित्त अखंड हरिनाम सप्ताह व गाथा भजन सोहळ्याचे आयोजन
भूमीपुत्र न्यूज
माळशिरस तालुक्यातील कोळेगांव येथे श्रीराम जन्मोत्सवाचे औचित्य साधून ‘अखंड हरिनाम सप्ताह व गाथा भजन सोहळा’ अत्यंत उत्साहात साजरा होणार आहे. ज्ञानेश्वर महाराज मंदिर, माउली नगर येथे आयोजित हा सोहळा शनिवार, दिनांक २१ मार्च २०२६ पासून सुरू होत असून शनिवार, दिनांक २८ मार्च २०२६ पर्यंत चालणार आहे.
कार्यक्रमाचे स्वरूप
सप्ताहाच्या काळात दररोज पहाटे ४ ते ६ काकडा आरती, ६ ते ७ विष्णुसहस्रनाम, ९ ते १२:३० गाथा भजन आणि दुपारी १ ते ६ हरिनाम जप होईल. सायंकाळी ६ ते ७ हरिपाठ आणि रात्री ९ ते ११ या वेळेत नामांकित कीर्तनकारांची कीर्तने रंगणार आहेत. त्यानंतर दररोज ‘हरीजागर’ होईल.
प्रमुख कीर्तनकार आणि मार्गदर्शक
या सप्ताहात महाराष्ट्रातील नामवंत कीर्तनकार आपली सेवा रुजू करणार आहेत, ज्यामध्ये:
- ह.भ.प. गुरुभक्तीभूषण महंत हरिहरनंद महाराज (पिलीव)
- ह.भ.प. हरि महाराज नामदास (पंढरपूर)
- ह.भ.प. उत्तम महाराज वराट (जामखेड)
- ह.भ.प. ज्ञानेश्वर महाराज बोंगीर (आळंदी)
- ह.भ.प. आनंता महाराज कदम (सातारा)
- ह.भ.प. मंगेश महाराज देशमुख (बोंडले)
- ह.भ.प. रुपेश महाराज माने (भाळवणीकर)
सप्ताहाची सांगता शनिवारी (२८ मार्च) रोजी सकाळी १० ते १२ या वेळेत ह.भ.प. गुरुवर्य बापूसाहेब महाराज देहूकर (माजी अध्यक्ष, संत तुकाराम महाराज संस्थान, देहू) यांच्या काल्याच्या कीर्तनाने होईल. त्यानंतर महाप्रसादाचे वाटप करण्यात येईल.
भोजनाची व्यवस्था
सप्ताहादरम्यान दररोज सकाळी अल्पोपहार, दुपारचे आणि संध्याकाळचे भोजन (अन्नदान) गावातील विविध देणगीदारांच्या वतीने आयोजित करण्यात आले आहे. शेवटच्या दिवशी संपूर्ण कोळेगाव ग्रामस्थांच्या वतीने ‘काल्याचा महाप्रसाद’ देण्यात येईल.
या आध्यात्मिक सोहळ्याचा लाभ घेण्याचे आवाहन माउली सेवा मंडळ, माउली नगर आणि समस्त कोळेगाव ग्रामस्थांनी केले आहे.
