अकलूज नगर परिषदेची तत्परता; गांधी चौकातील धोकादायक झाड हटविल्याने मोठी दुर्घटना टळली
भूमीपुत्र न्यूज
अकलूज येथील गांधी चौक परिसरातील ओंकार हॉस्पिटल शेजारी असलेले एक मोठे झाड वादळी वाऱ्यामुळे अत्यंत धोकादायक स्थितीत आले होते. हे झाड कधीही कोसळून मोठी जीवित किंवा वित्तहानी होण्याची भीती निर्माण झाली होती. मात्र, स्थानिक नगरसेवकांच्या मध्यस्थीने आणि अकलूज नगर परिषदेच्या तत्परतेमुळे हे झाड वेळेत हटवण्यात आले असून, संभाव्य मोठा अनर्थ टळला आहे. याबद्दल नागरिकांमधून प्रशासनाचे आभार मानले जात आहेत.
गांधी चौक परिसरातील गटाराजवळ असलेले हे महाकाय झाड जोरदार वाऱ्यामुळे एका बाजूला झुकले होते. कोणत्याही क्षणी ते रस्त्यावर किंवा शेजारील इमारतीवर कोसळण्याची चिन्हे होती. ही बाब स्थानिक नागरिकांच्या निदर्शनास येताच त्यांनी प्रभाग क्रमांक ८ चे नगरसेवक महेश शिंदे व नगरसेविका दिपाली वाघमोडे यांच्याशी संपर्क साधला. परिस्थितीचे गांभीर्य ओळखून दोघांनीही तातडीने घटनास्थळी धाव घेतली.
झाड उन्मळून पडल्यास वीजवाहिन्या तुटून मोठा अपघात होऊ शकत होता. ही भीती लक्षात घेऊन नगरसेवक महेश शिंदे आणि दिपाली वाघमोडे यांनी तातडीने अकलूज नगर परिषदेच्या संबंधित विभागाशी आणि महावितरणच्या अधिकाऱ्यांशी संपर्क साधला.सार्वजनिक सुरक्षिततेला सर्वोच्च प्राधान्य देत महावितरणने अपघात टाळण्यासाठी तात्काळ या भागातील वीजपुरवठा खंडित केला.तर नगर परिषदेच्या आपत्कालीन पथकाने क्रेन आणि आधुनिक उपकरणांच्या साहाय्याने धोकादायक झाड सुरक्षितपणे कापून बाजूला केले.
“आपत्कालीन परिस्थितीत नागरिकांच्या जीविताचे संरक्षण करणे ही प्रशासनाची आणि आमची नैतिक व कायदेशीर जबाबदारी आहे. त्यानुसार ही कारवाई पूर्णपणे जनहित आणि सुरक्षेच्या दृष्टीने करण्यात आली.”
महेश शिंदे व दिपाली वाघमोडे (नगरसेवक, प्रभाग क्र. ८)
वेळेवर आणि योग्य नियोजन करून ही कारवाई केल्याबद्दल प्रभाग क्रमांक ८ मधील नागरिकांनी नगरसेवक, नगरसेविका तसेच अकलूज नगर परिषदेच्या कर्मचाऱ्यांचे आणि महावितरणचे मनःपूर्वक आभार मानले आहेत. प्रशासनाच्या या तत्परतेमुळे परिसरातील व्यापाऱ्यांनी आणि रहिवाशांनी सुटकेचा श्वास सोडला आहे.
