गुन्हेगारीमुक्त समाजासाठी पोलीस-पत्रकार समन्वय आवश्यक – स.पो.नि.भाऊसाहेब गोसावी

वेळापूर पोलीस ठाण्याच्या वतीने पत्रकारांचा गौरव

भूमीपुत्र न्यूज/नितीन मगर

लोकशाहीत पोलीस आणि पत्रकार हे एकाच नाण्याच्या दोन बाजू असून, समाजाला न्याय मिळवून देण्यासाठी दोघांचेही योगदान महत्त्वाचे आहे. समाजातील सामान्य नागरिकांच्या समस्या, अन्याय व अडचणी प्रशासनापर्यंत पोहोचवण्याचे महत्त्वपूर्ण कार्य पत्रकार करत आहेत.

लोकशाहीचा चौथा स्तंभ म्हणून पत्रकारांनी सत्याची कास धरून, सामाजिक बांधिलकी जपत निर्भीडपणे आपले कार्य सुरू ठेवावे,” असे प्रतिपादन वेळापूर पोलीस ठाण्याचे प्रभारी अधिकारी सहाय्यक पोलीस निरीक्षक भाऊसाहेब गोसावी यांनी केले.

वेळापूर पोलीस ठाण्याच्या वतीने आयोजित पत्रकारांच्या सन्मान सोहळ्यात ते बोलत होते. यावेळी उपस्थित पत्रकारांना प्रशस्तीपत्र देऊन व पारंपारिक पद्धतीने फेटा बांधून सपोनि भाऊसाहेब गोसावी यांच्या हस्ते गौरवण्यात आले.

वेळापूर पोलीस ठाण्याचा पदभार स्वीकारल्यापासूनच्या प्रवासाचा आढावा घेताना गोसावी म्हणाले की, “माझ्या सेवाकाळात नेहमीच सर्वसामान्यांना न्याय मिळवून देण्याला प्राधान्य दिले आहे. वेळापूरमध्ये कामाची धुरा सांभाळताना पत्रकारांनी अत्यंत मोलाचे सहकार्य केले.

बातम्यांमधील पारदर्शकता आणि सत्यता तपासून त्या मांडल्यामुळे पोलीस प्रशासनालाही योग्य दिशेने तपास करून प्रकरणे न्यायालयात दाखल करण्यास मदत झाली.वेळापूर परिसरातील गुन्हेगारी मोडीत काढण्यासाठी पोलीस प्रशासनाने घेतलेल्या आक्रमक भूमिकेची माहिती देताना त्यांनी सांगितले की, गेल्या वर्षभरात परिसरातील सुमारे ७०% अवैध धंदे पूर्णपणे बंद करण्यात यश आले आहे.

गुन्हेगारांमध्ये कायद्याचा धाक निर्माण करण्यासाठी ५२ रेकॉर्डवरील गुन्हेगारांना तडीपार करण्यात आले आहे. गुन्हेगारांना कठोर शिक्षा मिळवून दिल्यामुळे अनेक अनैतिक कृत्यांना आळा बसला आहे.केवळ गुन्हेगारीच नव्हे, तर सामाजिक बांधिलकी जपत शेतकऱ्यांच्या विविध समस्या सोडवण्यासाठी विशेष पुढाकार घेतल्याचे गोसावी यांनी नमूद केले.

तसेच, वेळापूरमधून जाणाऱ्या आषाढी वारी पालखी सोहळ्याचे चोख नियोजन आणि शांतता राखण्यासाठी स्थानिक नागरिकांनी दिलेल्या सहकार्याबद्दल त्यांनी कृतज्ञता व्यक्त केली.या सोहळ्याप्रसंगी पोलीस उपनिरीक्षक कांबळे,पोलीस ठाण्यातील सर्व कर्मचारी आणि वेळापूर परिसरातील विविध वृत्तपत्रांचे प्रतिनिधी व पत्रकार बांधव मोठ्या संख्येने उपस्थित होते.