निमगावात छत्रपती ग्रुपतर्फे ‘आदर्श शिवजयंती’; डीजे-मिरवणुकीला फाटा देत किल्ले सिंधुदुर्गची शिवज्योत विराजमान

भूमीपुत्र न्यूज/नितीन मगर

निमगाव (ता. माळशिरस) येथील ‘छत्रपती ग्रुप’च्या वतीने छत्रपती शिवाजी महाराज यांची जयंती अवाजवी खर्चाला फाटा देत, अत्यंत साध्या आणि पारंपरिक पद्धतीने साजरी करण्यात आली. कोणतीही मिरवणूक, डीजे किंवा बँजो न लावता केवळ शिवरायांच्या विचारांचा जागर करण्यात आला. किल्ले सिंधुदुर्गवरून निमगावपर्यंत आणलेली शिवज्योत हे यंदाच्या सोहळ्याचे मुख्य आकर्षण ठरले.

किल्ले सिंधुदुर्ग ते निमगाव हे साधारण ४५० किलोमीटरचे अथांग अंतर पार करताना छत्रपती ग्रुपच्या शिवभक्तांनी आपल्या जिद्दीचे दर्शन घडवले. कोकणची अवघड चढण, घाट रस्ते आणि रात्रीची कडाक्याची थंडी यांची तमा न बाळगता, हातातील शिवज्योत अखंड धगधगती ठेवत या तरुणांनी हा प्रवास पूर्ण केला. साधारण ४० ते ५० शिवभक्त या मोहिमेत सहभागी झाले होते.

सिंधुदुर्गच्या पवित्र भूमीतून निघालेली ही ज्योत निमगावात पोहोचेपर्यंत सर्वांचा उत्साह तसूभरही कमी झाला नव्हता. या खडतर प्रवासात ठिकठिकाणी इतर शिवभक्तांनीही या ज्योतीचे स्वागत करून निमगावच्या या साहसी उपक्रमाचे कौतुक केले.छत्रपती ग्रुपचे सर्व सहकारी किल्ले सिंधुदुर्ग येथून शिवज्योत घेऊन गावात दाखल होताच ग्रामस्थांनी तिचे भक्तीभावाने स्वागत केले. ही ज्योत गावात आल्यानंतर अत्यंत शांततेत आणि शिस्तबद्ध पद्धतीने गावातून शिवज्योतीची फेरी काढण्यात आली. यावेळी गावातील प्रमुख मार्गांवर आणि चौकाचौकात ‘जय जिजाऊ, जय शिवराय’च्या जयघोषाने निमगावचा परिसर दुमदुमून गेला होता. मिरवणुकीचा गाजावाजा टाळून, केवळ महाराजांच्या इतिहासाचे स्मरण करत ही ज्योत मुख्य ठिकाणी आणण्यात आली.

सोहळ्याची सुरुवात छत्रपती शिवाजी महाराजांच्या पुतळ्याच्या पूजनाने झाली. यावेळी गावातील विविध क्षेत्रांतील मान्यवरांच्या हस्ते पुष्पहार अर्पण करून महाराजांना अभिवादन करण्यात आले. पुतळा परिसर भगव्या ध्वजांनी आणि फुलांच्या आकर्षक सजावटीने सुशोभित करण्यात आला होता. यावेळी उपस्थितांनी केवळ उत्सव साजरा न करता महाराजांनी उभारलेल्या गड-किल्ल्यांचा वारसा जपला पाहिजे आणि त्या इतिहासाचे वाचन केले पाहिजे, अशा भावना व्यक्त केल्या.सध्याच्या काळात मोठ्या आवाजाचे डीजे लावून मिरवणुका काढण्याची आणि अवाजवी खर्च करण्याची प्रथा वाढत असताना, निमगावमधील छत्रपती ग्रुपने याला फाटा देऊन एक नवा पायंडा पाडला आहे. दिखाव्यापेक्षा गड-किल्ल्यांवरून शिवज्योत आणून ती प्रज्वलित करणे, हेच शिवरायांच्या विचारांना खऱ्या अर्थाने दिलेली ‘मानवंदना’ आहे, असे या तरुणांनी आपल्या कृतीतून सिद्ध केले. अत्यंत संयमी आणि शिस्तबद्ध पद्धतीने पार पडलेल्या या सोहळ्यामुळे निमगावच्या वैभवात भर पडली असून, परिसरातील नागरिक आणि ज्येष्ठ मंडळींनी या सर्व शिवभक्तांच्या विचारसरणीचे विशेष कौतुक केले आहे.